Lýsing
Hljóðtengiverkefnin byggja á áralangri þróun verkefna sem Bryndís Guðmundsdóttir talmeinafræðingur hefur sérhannað fyrir skjólstæðinga og nemendur sína í talþjálfun. Einstaklingar með mismunandi bakgrunn og þarfir hafa tekið miklum framförum með verkefnunum. Hljóðtenging er mikilvæg til að þjálfa réttan framburð og undirbúa læsi.Mælt er með að byrjað sé á hljóðtengingu með samhljóði yfir í sérhljóð og í framhaldinu er hljóðtenging æfð með tengingu yfir í orð.
Teikningar eru alíslenskar og byggja á fyrirmynd „Lærum og leikum“ aðferðafræðinni sem þau Halla Sólveig Þorgeirsdóttir og Búi Kristjánsson hafa teiknað. Hvert orð og mynd í verkefnunum er sérvalið og prófað m.t.t. framburðar og orðaforða.
Í efninu eru þrjár möppur með: 1) samhljóði tengt við sérhljóð (17 verkefni) 2) samhljóði tengt inn í 1 – 2 atkvæða orð (25 verkefni) gulu myndirnar og 3) samhljóði tengt inn í 1 – 2 atkvæða orð (25 verkefni) bláu verkefnin. Í fjölbreytileika-veröld okkar er gefinn möguleiki á að fagaðilar og foreldar noti bláu eða gulu myndirnar eins og henta hverju sinni. Myndirnar eru einstaklega skýrar og fallegar og börn hafa gaman af að tengja hljóðaleikinn með mörgum litum, búa til regnboga, láta bát sigla frá sérhljóði yfir í orðin eða teikna frosk sem hoppar yfir í orðin sem fylgja. Um er um að ræða 67 verkefni í þremur verkefnapökkum. Hér að neðan má sjá dæmi um hverjum verkefnin henta.
Markmið og áherslur:
· Að bjóða góð framburðarverkefni sem styðja við réttan framburð íslensku málhljóðanna
· Að styrkja umskráningu; tengja heiti bókstafs og málhljóðs
· Að þjálfa hluta hljóðkerfisvitundar
· Að kenna nýjan orðaforða með fjölda mynda og orða*
· Að þjálfa hægt flæði tals t.d. hjá þeim sem stama eða þurfa að gæta að röddinni vegna hæsis eða rámrar raddar
· Að stuðla að opnari hljóðmyndun. Æfingar með sérhljóð henta vel bæði einstaklingum með opið nefmæli og af erlendum uppruna
· Að bjóða verkefni í hljóðtengingu sem henta vel einstaklingum með mállegt verkstol (apraxiu) sem felur í sér erfiðleika við samhæfingu talfæra og tals og hefur áhrif á framburð
